Д.Төмөрхүлэг, Н.Дагвасүрэн, Б.Тэмүүлэн нар Монголынхоо нэр дээр барилдахаар болжээ

Д.Төмөрхүлэг, Н.Дагвасүрэн, Б.Тэмүүлэн нар Монголынхоо нэр дээр барилдахаар болжээ

1 жилийн өмнө

Даваадоржын Төмөрхүлэг, Нямсүрэнгийн Дагвасүрэн, Баттулгын Тэмүүлэн нар өнгөрсөн хоёрдугаар сард Арабын Нэгдсэн Эмират Улсын нэр дээрээс татамид гарахаар болсон юм. Хоёр улсын жүдо бөхийн холбоодын гэрээ хэлэлцээр дуусвал ирэх тавдугаар сараас тэд шинэ “эх орныхоо” нэрийн өмнөөс барилдаж эхэлнэ хэмээн мэдэгдэж байсан ч тавдугаар сараас хойш олон удаагийн гран при тэмцээнүүд болон Дэлхийн аварга шалгаруулах тэмцээн болсон. Гэвч манай гурван тамирчин татамид гараагүй. Үүний учир нь гэрээ хэлэлцээр цуцлагдаж, тэд эргэн эх орныхоо нэр дээр барилдахаар болжээ.

Д.Төмөрхүлэг бол Монголын шилдэг жүдочдын нэг, -66 кг-ын жингийн дэлхийн гол өрсөлдөгч. Тэрээр өнгөрсөн хоёрдугаар сард дэлхийн чансаагаар эхний 10-т багтаж байсан бол сүүлийн найман сар олон улсын тэмцээнд оролцоогүйгээс одоо жиндээ 43-т эрэлбэлэгдэж байна.

Харин -81 кг-ийн жинд барилддаг Н.Дагвасүрэн өнгөрсөн онд л гэхэд Ташкентийн гран пригээс мөнгөн медаль, Токиогийн гранд сламаас хүрэл медаль хүртэж байсан бөгөөд дэлхийн чансаагаар жиндээ 16-д эрэмбэлэгдэж байна.

Харин Б.Тэмүүлэнгийн хувьд +100 кг-д барилддаг манай урдаа барьдаг тамирчдын нэг юм. Тэрээр дэлхийн чансаагаар жиндээ 46-д эрэмбэлэгдэж байна. Өнгөрсөн онд Экатринбургийн гранд сламаас хүрэл медаль хүртэж байсан билээ.

Манай гурван тамирчин энэ сарын 26-28-нд болох Абу Даби гранд сламд жин жиндээ хүч үзэхээр болсон бөгөөд одоо бэлтгэлээ хийж байна.

Манай улсын жүдогийн хөгжлийг дэлхий нийт хүлээн зөвшөөрөх болсны илрэл бол манай жүдочид бусад улс орны нэрний өмнөөс барилдах болсон явдал юм. Одоогийн байдлаар эмэгтэйчүүдийн 48 кг-ын жинд Г.Отгонцэцэг Казахстан, 48 кг-д Э.Базаррагчаа, 52 кг-д П.Буянхишиг, 57 кг-д М.Ичинхорлоо нар Азербайжан улсын нэрийн өмнөөс барилдаж байгаа билээ. Мөн шигшээ багт багтаж байсан цөөнгүй тамирчид бусад оронд дасгалжуулагчаар ажиллаж байгаа юм.

Newspress.mn